E puer metaphysesch Gedanken.

Verschidden Läit, oder och vill Läit, behaapten, dass eng Ofdréiwung emmer Mord ass. Mee mussen een dann net och, e bessen iwwerspëtzt formuléiert, der Logik no Abstinenz an Verhütung als Mord un zukünftegen Mënschen gesinn?

Generell sinn d’Läit jo fir den Erhalt vun mënschlechem Liewen, an gëint d’Beennegung vun mënschlechem Liewen duerch Force. En Deel vun hinnen wëllen dat och op dat nach ongebuerent Liewen ausdehnen. Wann also eng Ofdréiwung an engem spéiden Stadium dat selwecht wéi Kandsmord ass, gëlt dat dann och fir eng Ofdréiwung e bessen méi fréi, an nach bessen méi fréi, an kuerz do virdrun, asw ? Sou dass een schlussendlech bis zeréck op den Moment vun der Befruchtung selwer kënt.

Wann awer en mënschlecht Liewen schon mat der Befruchtung usech ufänkt, heescht dat dann net och, dass een all Kéiers potentiellen Mënschen d’Méiglechkeet hëlt fir op d’Welt ze kommen, wann een soit protégéierten Sex oder suguer guer keen Sex huet? An dat ass lo keen pro-Vatikan Argument, well Abstinenz wier an deem Sënn jo genausou ’schlemm’ wéi Sex mat Verhütungsmëttel.

Natiirlech kënnen nie all potentiell méiglech Mënschen op d’Welt kommen an dat ass jo och gudd sou. Mee den Raisonnement hei bewéist, dass d’Argument vum schützenswärten, ongebuerenen Liewen relativ ass an usech just d’Elteren betrefft.

Ween net op d’Welt kënt (an dann och opmanst die eischt puer Joer iwwerliewt) kann sech senger sëlwer jo och net bewosst sin an well en dann och net weess, wat en verpasst huet oder verpassen giff, kann een et also demno och net vermëssen. Ok, do woer en zukünftegen Mënsch amgaang ze entstoen an den kruut keng Chance fir ze existéieren, mee ass dat net och de Fall, wann een verhënnert, dass et iwwerhaapt zu engem zukünftegen Mënsch kann kommen?

Wat wier den Ennerscheed? Dass die puer Zellen schon eng ‘Séil’ hunn an Spermien an Eezellen, wann se nach separat sin, net? Well Bewosstsinn huet en Embryo jo definitiv nach net, oder kann een vun iech sech un eppes erenneren, wat virun der Gebuert passéiert ass? Suguer vun deenen eischten Méint voir Joeren weess een näischt.

Mee, wat ass eng Séil? An winni kritt een déi? Ass d’Séil eppes, wat Gott aus sengem Schaf hëllt an e puer Zellen ‘opdréckt’? Winni? Bei der Befruchtung, kuerz no der Gebuert, irgendwann doteschent? Hunn Fehlgebuerten eng Séil? Falls jo, ass et dann net genausou dramatesch (fir pro-Life Aktivisten) oder ongerecht, dass déi keng Chance op e Liewen kruuten?

Wann lo d’Séil net dat selwecht ass, wéi just den Charakter vun engem Mënsch, wat ass et dann? Wéi erkennt een d’Séil, wat dréckt se aus? Wat hätt en Mënsch net, wann en keng Séil hätt? Wat giff fehlen? Huet een Mënsch, deen e schwéieren Gehiirschued huet an sech werder bewegen nach expriméieren kann, nach eng Séil? Oder wier seng Séil an deem Fall an engem futissen Kierper gefaangen?

Wann awer d’Séil onofhängeg vum Zoustand vun deem jeweilegen Mënsch resp. seng Kierper, existéiert an näischt mat dem Charakter oder Verhalen vun deem Mënsch ze dinn huet, wat ass et dann? Ass mat Séil ‘just’ den ‘Liewensfunken’ gemengt, deen mëcht, dass mer lieweg sinn an deen verschwënnt, wann mer stierwen? Ass et die Energie, déi eis Kierperen animéiert? Mee wann et ‘just’ dat ass, wéi kann een dann sécher sinn, dass z.b. Déieren keng Séil hunn?

Wann eng Séil dann giff onofhängeg vum Gehiir, resp. deem sengem Zoustand existéieren, wier sie dann awer opmanst kapabel fir Erennerungen ze späicheren? Fir ’spéider’? Falls dat iwwerhaapt méiglech, an néideg, wier. Wat ass also den Zweck vun enger ‘Séil’?

Oder ass d’Séil awer just en romantescht Konstrukt dat d’Gehiir erfonnt huet? Resp. en religéist Konzept fir dat et net wirklech Argumenter ginn? D’Alternativ ass natiirlech, dass alles wat en Mënsch ausmëcht en Resultat vun Chemikalien an sengem Gehiir ass an dass dat verluer geht, wann dem Gehiir de Jus ausgeht.

Richteg wëssen wärten mer dat wuel an eiser jetzeger Form secher nie. Mee onbestreitbar ass, dass et ‘eppes’ gët, wat dem Kierper (egal op vum Mënsch oder Déier) lieweg mëcht, wat en animéiert an um Liewen erhält. An dass dëst ‘eppes’ verschwënnt, wann een stierwt. Eng Läich ass ‘just’ e Koup Schanken a Fleesch.

Et gët allerdengs keen Grond fir dowéinst ze verzweifelen. Mir kënnen emmer nach Deel vun eppes méi Groussem sinn, wat all eis Virstellungskraaft iwwersteigt an wat mer dowéinst och einfach net verstoen können, bis mer selwer doud sinn.

Dat soll eis awer net drun hënneren fir gängeg Argumenter an Meenungen weiderhin ze hannerfroen an och kontrovers Saachen ze soen, wann se opmanst eng gewëss Logik opweisen.

(Iwwert d’Konzept vun der Séil kéint een natiirlech nach vill méi schräiwen an débatéieren)