Firwat bloggen?

Hei ‘kuerz’ firwat ech bloggen:

Ech perséinlech interesséiere mëch fir vill Saachen, dacks queesch duerch de Gaart, wëll awer net emmer anere Läit domadder op d’Schlappen goen (an die meescht interesséieren die Saachen och net onbedëngt). Duerfir ass de Blog e gudde Moyen fir mäi Matdeelungsbedürfnis ze befriddegen. An wann ech et da mol bis gepost hunn, da leet sech dat och nees.

De Contenu vun mengen Posts ass verschidden. Op der enger Säit grommelen ech natiirlech iwwer aktuell Evénementer, Läit oder Situatiounen, déi et menger Meenung no verdëngt hunn (an dorausser erginn sëch an der Tëschenzäit och heiandso ganz interessant Diskussiounen mat deenen, déi meng Posts kommentéieren). Mee op der anerer Säit versichen ech awer och fir mat dem Verlinken op interessant Artikelen oder Websiten e ganz bescheidenen Deel dozou bäizedroën, dass Qualitéit a Kultur net komplett géint den Trash an d’Proletentum verléieren.

Heiandsdo publizéieren ech hei och meng Gedanken zu philosopheschen Themen, déi mer grad duerch de Kapp ginn, wéi zum Beispill ‘E puer metaphysesch Gedanken‘ an ‘Ass de Bello en Zombie?‘. Zäitweis tauchen relativ vill religéis ugehauchten Artikelen op, dat awer generell vun engem kriteschen, skepteschen Standpunkt aus. An deem Kader hat ech eng Kéier ugefaangen dat Neit Testament ze bloggen (op englesch), haaptsächlech fir die Irrwitzegkeeten, déi do dran stinn an déi quasi keen vun den Gleewegen wirklech kennt, mol eng Kéier opzewéisen. Dovunner ofgesinn sinn ech awer mam Jesus sengen Love & Peace Usiichten komplett averstan an behaapten och net, dass Religioun nemmen schlecht wier. Et hänkt just dovunner of, wéi een domadder emgeht.

Last, but not least, erlaabt mer den Blog och fir bësse kreativ ze sinn.

An pour info: ech sinn an deem Joër gebuer, wou de Nixon seng Résignatioun eragereecht huet.